Երկուշաբթի, 5 յունւար 2026 թւականին՝ Ամանորի եւ Սուրբ Ծննդեան տօների առիթով, Ազգային Առաջնորդարան այցելեցին Թեհրան նահանգի Իսլ. Ազատ Համալսարանի տնօրէն դկտր. Ֆիրուզ ֆարը եւ նրան ընկերակցող պատւիրակութիւնը:

Ազգ. Առաջնորդարանի դահլիճում հիւրերին դիմաւորեցին Ի. Իսլ. Խորհրդարանում Թեհրանի եւ հիւսիսային իրանահայութեան պատգամաւոր դկտր. Արա Շահվերդեանը, Պատգամաւորական Ժողովի ատենադպիր Արտոյտ Զոհրաբեանը, Թեմական խորհրդի ատենապետ Վարուժ Յովհաննիսեանը, նոյն խորհրդի փոխատենապետուհի Արմինէ Սէթխանեանը, ազգ. առաջնորդարանի դիւանապետ Զօրիկ Կարապետեանը եւ Հանրային կապի հոգեւոր խորհրդատու Տ. Գրիգորիս քհնյ. Ներսիսեանը:

Ի. Իսլ. Խորհրդարանում Թեհրանի եւ հիւսիսային իրանահայութեան պատգամաւոր դկտր. Արա Շահվերդեանը ողջունելով հիւրերին, շնորհակալական խօսքեր յայտնեց այցի կապակցութեամբ: Նա նշեց, որ տօնական օրերի այցելութիւններն առիթ են միմեանց հետ ծանօթանալու եւ կապերն ամրապնդելով, համագործակցելու, խնդիրների մասին խօսելու եւ լուծում գտնելու համար: Իր արտայայտութիւններում Պատգամաւորը կարեւորութեամբ անդրադարձաւ հայ եւ իրանցի ժողովրդի դարաւոր խաղաղ գոյակցութեանն ու փոխյարաբերութեանը եւ նշեց, որ իրանահայերը, որպէս Իրանի մեծ ընտանիքի անդամ, չեն խնայել իրենց կարելին երկրի վերելքի եւ տարածքային ամբողջականութեան պահպանման ճանապարհին:

Հանդիպման ընթացքում Թեմական խորհրդի ատենապետ Վարուժ Յովհաննիսեանը, փոխատենապետուհի Արմինէ Սէթխանեանը եւ Հանրային կապի հոգեւոր խորհրդատու Տ. Գրիգորիս քհնյ. Ներսիսեանն իրենց հերթին ողջունելով, անդրադարձան իրանահայ անւանի եւ հանրայայտ հայորդիների՝ գիտական, հասարակական, մշակութային, մարզական եւ արւեստի տարբեր բնագաւառներում ներդրած աւանդին եւ գործօն դերակատարութեանը նաեւ հայ-իրանական մշակութային եւ քրիստոնեայ-իսլամ կրօնական ընդհանրութիւններին:

Առանձին ելոյթներով արտայայտւեցին եւ Ամանորի ու Ս. Ծննդեան տօների առիթով շնորհաւորեցին յարգոյ հիւրերը եւ իրենց շնորհակալութիւնը յայտնեցին ջերմ ընդունելութեան համար: Արտայայտութիւններում անդրադարձ կատարւեցին, Քրիստոսի եւ Ս. Կոյս Մարիամ Աստւածածնի վեհութեանն ու շնորհներին նաեւ իսլամութեան ու քրիստոնէութեան միասնական եզրերին նշւելով, որ երկու կրօնները հաւատում են Փրկչի գալստեան եւ աղօթքի զօրութեան, որոնք յոյս են ներշնչում բոլոր Աբրահամեան կրօնների հետեւորդներին:

Սոյն հանդիպման ներկայ էին նաեւ Իսլ. Ազատ Համալսարանի Գիտական կազմից հայ դասախօսներ՝ դկտր. Անի Միրզախանեանը, ով նաեւ անդամն է Թեմական խորհրդի, դկտր. Անէթ Աբգարը, դկտր. Արմէն Ադամեանը, դկտր. Ալիս Ասատրեանը, դկտր. Անիթա Բաղդասարեանը, դկտր. Անիթա Հայրապետեանը եւ դկտր. Անդրանիկ Սիմոնեանը, ովքեր Թեհրանի Իսլ. Ազատ համալսարանում իրենց աշխատանքային ոլորտը եւ անցեալը ներկայացնելով, շնորհակալութիւնը յայտնեցին ցուցաբերւած ուշադրութեան եւ նման առիթ ստեղծւելու կապակցութեամբ:

Հանդիպման աւարտին, յուշանւէրներ փոխանակւեցին կողմերի միջեւ եւ յարգոյ հիւրերին նւիրւեցին «Իրանի հայկական եկեղեցիներ» խորագրով՝ պարսկերէն լեզւով հրատարակւած գիրքը եւ «ارمنیان ایران و نام آوران ارمنی» եւ «کلیسای ارمنی» խորագրով գրքերը, ապա այցելութիւն կատարւեց Ս. Սարգիս եկեղեցի:

Ազգային Առաջնորդարանի Հանրային Կապ