Իրանահայ ժառանգութիւնը՝ Իրանի ազգային արժէք

Երեքշաբթի, 30 դեկտեմբեր 2025 թւականին, Ամանորի եւ Ս. Ծննդեան տօների առիթով, Ազգ. Առաջնորդարան այցելեցին Իրանի Մշակութային ժառանգութեան, ձեռարւեստի եւ զբօսաշրջութեան նախարար դկտր. Սէյեդ Ռեզա Սալեհի Ամիրին եւ յարակից բաժինների պատասխանատուները:

Ազգ. Առաջնորդարանի դահլիճում հիւրերին դիմաւորեցին Թեմիս Առաջնորդ Գերշ. Տ. Սեպուհ Ս. Արք. Սարգսեանի օգնական՝ Հոգշ. Տ. Առաքել Աբղ. Գատեհճեանը, տօնական օրերի առիթով քաղաքս հիւրաբար գտնւող՝ Հոգշ. Տ. Աբրահամ Աբղ. Ճուլֆայեանը, Ի. Իսլ. խորհրդարանում Թեհրանի եւ հիւսիսային իրանահայութեան եւ Սպահանի ու հարաւային իրանահայութեան պատգամաւորներ՝ Արա Շահվերդեանը եւ Գեղարդ Մանսուրեանը, Թեմական խորհրդի ատենապետ Վարուժ Յովհաննիսեանը, փոխատենապետուհի Արմինէ Սէթխանեանը եւ նոյն խորհրդի անդամ՝ պրն. Հարմիկ Աւետեանը:

Հոգշ. Տ. Առաքել Աբղ. Գատէհճեանը, Թեմակալ Առաջնորդի ողջոյնները եւ օրհնութիւնը փոխանցելով, շնորհակալութիւն յայտնեց հիւրերին՝ ներկայութեան եւ շնորհաւորանքների համար: Հայր Սուրբը յայտնեց, որ տօնական օրերին պետական այրերի այցելութիւնները մեծ պատիւ եւ ուրախութիւն է եւ ապացուցում է Իրանի ղեկավարութեան կողմից իրանահայ համայնքի նկատմամբ ունեցած սէրն ու յարգանքը նաեւ այն, որ դուք արժեւորում էք այն հարուստ եւ հսկայ ժառանգութիւնը, որ դարերի ընթացքին ձեւաւորւել է իրանի եւ հայ ժողովուրդների ազգային մշակութային եւ հոգեւոր ինքնութեան վրայ: Նա յաւելեց, որ Իրանը իր բազմադարեան պատմութեամբ եղել է տարբեր կրօնների համակեցութեան եզակի օրինակ: Նա նշեց, որ իրանի համար ժառանգութիւնը միայն անցեալի յիշատակ չէ այլ կենդանի ապրող կամուրջ է ժողովուրդների միջեւ եւ այս առումով Ձեր ծառայութիւնը եւ աշխատանքը կարեւոր դեր ունի պահպանելու մէկ կողմից ժառանգութիւնը եւ միւս կողմից այն փոխանցելու գալիք սերունդներին եւ մենք իբրեւ իրանահայ համայնք պատրաստ ենք միշտ մեր բաժինը ներդնել այս աշխատանքին: Հայր Սուրբն իր արտայայտութիւնների աւարտին յոյս յայտնեց, որ գալիք տարին համայն աշխարհին եւ յատկապէս Իրանին բերի ամէն տեսակի բարիք եւ օրհնութիւն:

Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը նաեւ իր հերթին ողջունելով, բարձր գնահատեց նախարարի այցը՝ նշելով, որ տարբեր նահանգներում, մասնաւորապէս Ատրպատականի թեմում, իրականացւում են հայկական եկեղեցիների պահպանման ուղղութեամբ հետեւողական աշխատանքներ։ Այս ուղղութեամբ Իրանի Իսլամական խորհրդարանում Սպահանի եւ հարաւային իրանահայութեան պատգամաւոր Գեղարդ Մանսուրեանը նաեւ դրական ադրադարձ ունեցաւ համայնքի եկեղեցիների պահպանման համար ցուցաբերւող ուշադրութեան:

Դկտր. Սալեհին Ամանորեայ եւ Ս. Ծննդեան տօնական օրերի առիթով շնորհաւորանքներ եւ բարեմաղթանքներ յայտնելով, փոխանցեց Իրանի Հանրապետութեան նախագահ դկտր. Մասուդ Փեզեշքեանի ողջոյնի խօսքերը: Նա հանդիպման ընթացքում ընդգծեց, որ «Հայ համայնքի կրօնական ու պատմական ժառանգութիւնը Իրանի ազգային ժառանգութեան անբաժանելի մասն է», աւելացնելով, որ նախարարութիւնը շարունակելու է աջակցել եկեղեցիների պահպանման, վերանորոգման եւ զբօսաշրջային ենթակառուցւածքների զարգացման ծրագրերին։

Հանդիպման աւարտին, յարգոյ հիւրին նւիրւեցին «Իրանի հայկական եկեղեցիներ» խորագրով՝ պարսկերէն լեզւով հրատարակւած գիրքը եւ «ارمنیان ایران و نام آوران ارمنی» եւ «کلیسای ارمنی» խորագրով գրքերը, ապա նահատակների յուշարձանի մօտ ծաղիկներ խոնարհւեց եւ այցելութիւն կատարւեց Սուրբ Սարգիս եկեղեցի:

Սոյն հանդիպման նաեւ ներկայ էին՝ ազգ. առաջնորդարանի դիւանապետ՝ Զօրիկ Կարապետեանը, Հանրային կապի հոգեւոր խորհրդատու Տ. Գրիգորիս քհնյ. Ներսիսեանը, «Ա. Մանուկեան» ազգ. թանգարանի յանձնախմբի, միութիւնների եւ ազգ. մարմինների ներկայացուցիչները նաեւ Իրան-Իրաք Պարտադրեալ Պատերազմի Հայ Նահատակների եւ Անձնուրացների Արժէքների Պահպանման յանձնախմբի ներկայացուցիչներ՝ անձնուրաց պրն. Անդրանիկ Իբրանոսեանը եւ ազատորդի-անձնուրաց պրն. Այվազ Խուդավերդեանը, ովքեր գնահատւեցին նախարարի կողմից:

Ազգային Առաջնորդարանի Հանրային կապ