Իսլամական մշակոյթի եւ առաջնորդութեան նախարարութեան նախաձեռնութեամբ եւ Իրանի Իսլ. Հանրապետութեան նախագահ Մասուդ Փեզեշքիանի ներկայութեամբ երկուշաբթի, փետրւարի 9-ի երեկոյեան Իրանում կրօնական փոքրամասնութիւնների հոգեւոր առաջնորդների, Իսլ. խորհրդարանի պատգամաւորների եւ տարբեր ոլորտների ներկայացուցիչների ներկայութեամբ միջոցառում էր կազմակերպւել Իրանի Իսլամական յեղափոխութեան յաղթանակի 47-րդ տարեդարձի առիթով:
Միջոցառմանը իր ելոյթի ընթացքում նախագահ Փեզեշքիանը ընդգծեց մարգարէների դերը արդարութիւն հաստատելու, բարութիւն տարածելու եւ հասարակութեան մէջ մարդու իրաւունքները պաշտպանելու գործում։ Նախագահը ընդգծելով Իրանի Իսլամական Հանրապետութեան սկզբունքային քաղաքականութիւնը՝ յաւելեց. «Մենք սկզբից յայտարարել ենք, որ չենք ձգտում պատերազմի, մենք ձգտում ենք միասնութեան, համախմբւածութեան եւ ժողովրդին ծառայելու»: Միջոցառմանը կարեւորելով Իրանի քաղաքական ու հասարակական կեանքում կրօնական փոքրամասնութիւնների անժխտելի դերը՝ ելոյթներով հանդէս եկան Իսլամական մշակոյթի եւ առաջնորդութեան նախարար Սէյէդ Աբբաս Սալեհին եւ Կրօնական, էթնիկ եւ դաւանանքների հարցերով Հանր. նախագահի յատուկ օգնական հոջ. Սէյէդ Մահմուդ Ալաւին: Ելոյթներով հանդէս եկան Իրանում կրօնական փոքրամասնութիւնների հոգեւոր ներկայացուցիչները: Ատրպատականի հայոց թեմի առաջնորդ Տ. Գրիգոր արք. Չիֆթճեանը Իրանը համարեց կրօնական փոքրամասնութիւնների խաղաղ գոյակցութեան օրրան:
Թեհրանի հայոց թեմի առաջնորդ Տ. Սեպուհ արք. Սարգսեանի օգնական Տ. Առաքել աբեղայ Գատեհճեանը իր ելոյթի ընթացքում նշեց. «Այսօրւայ բարդ եւ փոփոխական աշխարհի պայմաններում առանձնապէս կարեւոր է, որ հասարակութեան տարբեր շերտերը գործեն փոխըմբռնման եւ փոխադարձ վստահութեան մթնոլորտի մէջ: Մենք համոզւած ենք, որ կայունութիւնը եւ անվտանգութիւնը կարելի է ապահովել ո՛չ միայն վարչական միջոցներով, այլ նաեւ հասարակական համերաշխութեան եւ միմեանց լսելու միջոցով»:
Լուրը՝ «Ալիք»-ից